തൃശൂർ: ജി.സുധാകരന് ഒരിക്കലും കോണ്ഗ്രസിലേക്ക് പോകാൻ കഴിയില്ലെന്നും സുധാകരന്‍റെ മനസ് പകുതി ബിജെപിക്കാരന്‍റേതാണെന്നും ബിജെപി സംസ്ഥാന ഉപാധ്യക്ഷൻ ബി.ഗോപാലകൃഷ്ണൻ.ബിജെപി ആലപ്പുഴ ജില്ലാ പ്രസിഡന്‍റും താനും ചേർന്ന് സുധാകരനെ വീട്ടിൽ പോയി കണ്ടിരുന്നുവെന്നും സുധാകരൻ കാണിച്ച സ്നേഹവും ബഹുമാനവും എടുത്തുപറയേണ്ടതാണെന്നും ഗോപാലകൃഷ്ണൻ പ്രകീർത്തിച്ചു.
വിശിഷ്ട വ്യക്തിത്വങ്ങളെ കണ്ട് ആദരിക്കണം എന്ന നരേന്ദ്രമോദിയുടെ ആഹ്വാനത്തിന്‍റെ ഭാഗമായാണ് തങ്ങൾ സുധാകരനെ കാണാൻ പോയതെന്നും ഗോപാലകൃഷ്ണൻ വിശദീകരിച്ചു.സത്യസന്ധനായ കമ്മ്യൂണിസ്റ്റും പൊതുപ്രവർത്തകനുമാണ് ജി.സുധാകരനെന്ന് പുകഴ്ത്തിയ ഗോപാലകൃഷ്ണൻ തങ്ങൾ ബിജെപിയുടെ പ്രത്യയശാസ്ത്ര ഗ്രന്ഥം സുധാകരന് സമ്മാനിച്ചുവെന്നും പറഞ്ഞു.
സിപിഎം രാജ്യദ്രോഹികളുമായി കൈകോർത്ത് ആദർശം കുഴിച്ചുമൂടുന്ന സമയമാണിത്.ആലപ്പുഴയിൽ ഭീകരവാദ പ്രസ്ഥാനത്തിന്‍റെ നേതാക്കൾ സിപിഎമ്മിനുള്ളിൽ നുഴഞ്ഞുകയറി സിപിഎമ്മിനെ ഇല്ലാതാക്കി കൊണ്ടിരിക്കുകയാണ്. കൂടിക്കാഴ്ചയിൽ ഇക്കാര്യവും ഞങ്ങൾ സംസാരിച്ചു. എല്ലാം ജി. സുധാകരൻ മൗനമായി കേട്ടു.
കമ്യൂണിസ്റ്റ് പാർട്ടി രാജ്യദ്രോഹികളുടെ കരാളഹസ്തത്തിൽ ആണെന്ന ഞങ്ങളുടെ വാദം സുധാകരൻ അംഗീകരിക്കുന്നുണ്ട്. സുധാകരന് ഒരിക്കലും കോണ്ഗ്രസിലേക്ക് പോകാൻ ആവില്ല.തീവ്രവാദികൾ സിപിഎമ്മിൽ നുഴഞ്ഞുകയറി എന്ന കാര്യത്തിൽ ബിജെപിയുടെ പകുതി മനസ് സുധാകരനും ഉണ്ടെന്നും അദ്ദേഹം പറഞ്ഞു.
